मुलांच्या शिक्षणात पालकांचा सहभाग महत्त्वाचा असतो, हे लक्षात घेऊन शाळेत पालकसंपर्काला विशेष महत्त्व दिले जाते. पालक व शिक्षक यांच्यातल्या सुसंवादामुळे मुलाची शाळेविषयीची आत्मीयता वाढते. त्यासाठी शाळेत वेगवेगळे प्रयत्न केले जातात.
शाळेने स्वीकारलेली अध्ययन-अध्यापन पद्धती, मूल्यमापन पद्धती त्यामागील विचार, भूमिका तसेच शाळेत चालणारे विविध उपक्रम, कार्यक्रम याची माहिती देण्यासाठी दर दोन महिन्यातून एकदा पालकसभा घेतली जाते.
दरवर्षी पालक कार्यशाळा घेतली जाते. त्यात मुलांच्या शारीरिक वाढीबरोबरच मानसिक वाढीचे टप्पे, पालकांची भूमिका, मुलांच्या काही सवयी, वर्तनविषयक समस्या असे विषय हाताळले जातात. या विषयी तज्ञांचे मत, विचार काय आहेत ते समजून घेतले जातात. तसेच पालकांच्या अनुभवांची देवाणघेवाण केली जाते.
शाळेत सतत काही उपक्रम, कार्यक्रम होतच असतात. त्यासाठी शैक्षणिक साहित्यनिर्मिती, मुलांचा खाऊ, स्नेहसंमेलन, क्षेत्रभेटी, सहली अशा वेगवेगळ्या कामांसाठी पालकांची जाणीवपूर्वक मदत घेतली जाते. अशा सक्रिय सहभागामुळे पालकांचे शाळेशी वेगळेच नाते निर्माण होते.
पालकांशी वर्षभरात गरजेनुसार नियमितपणे संवाद साधला जातो. मूल्यमापनाच्या निमित्ताने दोन्ही सत्रांच्या अखेरीस प्रत्येक मुलाच्या पालकांसोबत मुलाच्या प्रगतीचा आढावा घेतला जातो. त्यावेळी मुलाच्या शिकण्यासंदर्भातले शिक्षकांचे निरीक्षण पालक समजून घेतात.
परीक्षेतील विषयानुरुप मिळालेल्या गुणांइतकेच महत्त्व असलेल्या इतर बाबी म्हणजे मुलाचा कल, क्षमतांचा विकास याचबरोबर उणिवा, विशेष काम करावे लागणाऱ्या काही बाबी याचीही मोकळी चर्चा इथे घडते.
मुलाच्या कुटुंबातील व्यक्तिंशी सहज संवाद साधण्यासाठी शिक्षक त्या मुलाच्या घरी जातात. विविध कारणांनी शिक्षक या गृहभेटी करतात.
मुलाच्या शिक्षणात शाळेबरोबरच त्याच्या घराचाही सहभाग तितकाच महत्त्वाचा आहे.